Депутат Дәулет Тұрлыхановтың ұлы бостандыққа шықты

Қылмыстық атқару жүйесі комитеті Дәулет Тұрлыхановтың ұлы Нұрасыл Болаттың бостандыққа шыққанын растады, деп хабарлайды Orda.kz. 

Ведомство өкілдері сот тағайындаған мерзімнің аяқталуына байланысты оның босатылғанын мәлімдеді. 

Нұрасыл Болаттың есімі 2023 жылдың 11 ақпанынан бастап кеңінен тарады. Отардағы әскери бөлімде борышын өтеп жүруі тиіс болған Нұрасыл Болат Алматыда бой көрсеткен. Ол адвокаттар Олег пен Анна Черновтарды соққыға жыққан.

Осы іс бойынша сол жылдың 9 қазанында әскери сот оны бұзақылық ниетпен денсаулыққа қасақана орташа зиян келтірді деп тауып, 1,7 млн теңге айыппұл салды. Кейіннен 2024 жылдың 14 мамырында Жоғарғы сот үкімді өзгертіп, депутаттың ұлына 2 жылға бас бостандығын шектеу жазасын кесті.

Алайда ол түнгі уақытта көңіл көтеретін орындарға баруға салынған тыйымды елемей, 14 қазанда тойда жүрген жерінен ұсталды.

Пробация шарттарын қасақана бұзғаны үшін 2024 жылдың 21 қазанында Медеу аудандық соты оның өтелмеген жазасын нақты қамауға алумен алмастырып, сот залында кісен салды.

Жазаны ауыстыру кезінде Нұрасыл Болат бас бостандығын шектеудің 6 ай 12 күнін өтеп үлгергендіктен, қалған 1 жыл 5 ай 18 күнді орташа қауіпсіздік колониясында өткізуге міндеттелді.

Оқи отырыңыз:

• Дәулет Тұрлыханов Қазақ күресі федерациясының басшысы қызметінен кетті
• Өзімді жаман сезініп тұрмын – Дәулет Тұрлыханов
• Трамп Иранды «тас дәуіріне қайтаратынын» мәлімдеді