Депутат Азат Перуашев халық Тоқаевты қолдау керектігіне сенімді

«Ақжол» партиясының төрағасы, мәжіліс депутаты Азат Перуашев президент Қасым-Жомарт Тоқаевты қолдайтынын мәлімдеді. Оның айтуынша, Тоқаев елдегі жағдайды жалғыз өзі қалыпқа келтіріп жатыр.

Сондай-ақ, Қасқа жол бағдарламасына берген сұхбатында депутат экс-президент Назарбаевтың халық алдына шықпауына қатысты өз ойымен бөлісті.

Перуашев қазір тағайындалып жатқан министрлер Тоқаевпен кезінде бірге істеген, өзі жақсы танитын адамдар екенін алға тартты.

«Ендігі үкіметті Тоқаевтың үкіметі деп айтуға болады» деді депутат.

Ол сондай-ақ, төңкеріс кезінде халық Назарбаевтың үндеуін күткені туралы да сөз қозғады.

«Бәріміз Елбасы халық алдына шығып үндеу жасай ма деп күттік. Ондай болған жоқ. Әрі қарай не боларын көрейік. 

Ол кісі барша міндетін тапсырды. Тіпті қауіпсіздік кеңесінің төрағалығын тапсырды. Әрі қарай ол – қатардағы зейнеткер. Мемлекеттің ішінде оның құзыреттері қалмады. Әрі қарай тек осы президентпен жұмыс істеуіміз керек» деді Перуашев.

Депутат Елбасын құрметтегенімен, енді Тоқаевты қолдайтынын мәлімдеді.

«Біз оны қолдауымыз керек. Себебі төңкеріс әрекетіне қарсы тұрған тек Тоқаевтың өзі» деп түсіндірді депутат.