150 млн еуро инвестиция: Тоқаев пен ЕО басшылары жаңа келісімдерге келді

23 маусымда Қасым-Жомарт Тоқаев Брюссельге ресми сапармен барып, Еуропалық кеңес төрағасы Антониу Коштамен және Еурокомиссия басшысы Урсула фон дер Ляйенмен кездесті, деп хабарлайды Orda.kz.

Келіссөз қорытындысы бойынша тараптар бірлескен мәлімдеме қабылдады.

Еуропалық Одақ – Қазақстанның негізгі сауда және инвестициялық серіктесі. Тараптар Транскаспий халықаралық көлік бағытын дамытуға ерекше назар аударып, «Жаһандық қақпа» стратегиясы аясында сирек кездесетін металдар, энергетика, көлік және цифрландыру салаларындағы ынтымақтастықты арттыруға келісті. Сонымен қатар, 2025 жылы 10 жылдығы аталған Кеңейтілген серіктестік туралы келісім аясындағы байланыстарды тереңдету ниетін растады.

Қазақстандықтар үшін виза рәсімдеуді жеңілдету және реадмиссия туралы келісімдер бойынша келіссөздер сәтті аяқталды. Сондай-ақ көлденең авиациялық келісімге қол қойылды.

Еуропаға мұнай мен уран тасымалдайтын негізгі ел ретінде Қазақстан жасыл энергетика, бейбіт атом саласы және тұрақты шикізат пен «жасыл» сутегі өндірісіндегі байланысты күшейтпек. Санкцияларға қатысты келіссөздер жалғасады.

Еуропалық инвестициялық банк (ЕИБ) және Еуропалық қайта құру және даму банкімен (ЕҚҚДБ) жаңа жобалар мақұлданды. Оның ішінде көлік байланысын қолдауға бөлінген 150 миллион еуро және халықаралық химиялық-аналитикалық зертхана құру бастамасы бар. Астанада ЕИБ өкілдігін ашу жоспарланып отыр.

Бұдан бөлек, Air Astana мен Airbus жалпы құны 7,145 миллиард еуро болатын 50 дана A320neo/A321neo ұшағын жеткізу туралы келісім жасады.

ЕО өкілдері Қазақстандағы саяси реформаларды, соның ішінде 2026 жылғы наурызда референдум арқылы қабылданған жаңа Конституцияны оң бағалады. Орталық Азия мен Еуроодақ қатынасы стратегиялық серіктестік деңгейіне көтерілгені атап өтілді. Сондай-ақ, ЕО БҰҰ жүйесінде Халықаралық су ұйымын құру туралы Қазақстанның бастамасын назарға алды.