Денсаулық сақтау министрі Алматыда қандай жаңа ауруханалар салынатынын айтты

Денсаулық сақтау министрлігінің басшысы Ажар Ғиният Алматыдағы ауруханалардың, соның ішінде қызылша дертіне байланысты жүктеменің шамадан тыс көп екенін мойындап, мегаполисте салынатын жаңа медициналық нысандар туралы айтты, деп хабарлайды Orda.kz.

Министрдің айтуынша, Алматы әкімдігі үкіметтің қолдауымен қалада бірнеше аурухана салады.

«Алатау ауданында 500 төсектік перинаталдық орталығы бар көпсалалы аурухана салынады. Сондай-ақ заманауи қондырғылармен жабдықталған онкологиялық орталық салу жоспарлануда. Келесі жылы, менің ойымша, жыл басында біз жаңа жұқпалы аурулар ұлттық ғылыми орталығын пайдалануға береміз, ол да ғылыми зерттеулермен айналысатын болады», - деді министр Алматыда өткен баспасөз мәслихатында.

Бұған дейін Алмалы ауданындағы бұрынғы теміржол ауруханасы ғимаратында балаларды оңалту орталығы құрылатыны хабарланған болатын.