Денсаулық сақтау министрі ҒЗИ ұжымдарымен кездесті

Денсаулық сақтау министрі Алексей Цой Алматыда Кардиология және ішкі аурулар ҒЗИ және онкология және радиология ҚазҒЗИ ұжымдарымен кездесу өткізіп,  Алматы облысындағы «Антиген» зауытында болды.

Министр Кардиология және ішкі аурулар ғылыми-зерттеу институтында халықаралық сапа стандарттарына сәйкес жаңғыртылған рентгенэндоваскулярлық операциялық блок пен кардиохирургиялық операциялық бөлімшені қарап шықты. Мұнда ересектерге кардиохирургиялық операциялардың барлық түрі жасалады. Сонымен қатар Цой анестезиология, реанимация және қарқынды терапия бөлімінде болды.

Бұл туралы  Orda.kz  хабарлады.

Денсаулық сақтау министрлігінің басшысы ҒЗИ ұжымын медициналық ұйымда көрсетілетін қызметтердің сапасы мен қауіпсіздігін ең беделді әрі объективті түрде мойындайтын JCI аккредитациясын алуымен құттықтады.

Сонымен қатар, министр Алматыдағы Қазақ онкология және радиология ғылыми-зерттеу институтына барып, ҚазОРҒЗИ базасында ашылған жаңа Томотерапия орталығымен танысты.

— Бұл  орталық онкологиялық науқастарды емдеуге арналған. Бұл онкопациенттерді сәулелік емдеуді жетілдіруге мүмкіндік береді. Осы уақытқа дейін Қазақстанда тек бір ғана Томотерапия орталығы - Нұр-сұлтан қаласында болды, бұл біздің барлық пациенттеріміз үшін жеткіліксіз. ҚазОРҒЗИ-дағы жаңа Томотерапия орталығында  еліміздің  тұрғындарына жоғары технологиялық медициналық көмек тегін көрсетіледі, - деп атап өтті Цой.

Алматыдағы сапары аясында министр «Антиген» зауытының отандық вакцинасын шығару жөніндегі биологиялық қауіпсіздік проблемалары институтының жаңа өндірістік алаңын да көріп шықты.