Денсаулық сақтау министрі мүмкіндігі шектеулі жанға қызмет ұсынды

Денсаулық сақтау министрі Ажар Ғиният Шымкент қаласының тұрғыны, арбаға таңылған Алмас Өткіровке штаттан тыс кеңесші қызметін ұсынды.

Басқарма басшысы қала әкімдігінің мәжіліс залында жұртшылықпен және азаматтық сектор белсенділерімен кездесу өткізді. Қала тұрғындары мен қоғам белсенділері министрге қалалық емханаларға кейбір мамандардың қолжетімділігі, мүгедектік тағайындау, міндетті медициналық сақтандырудың жеңілдетілген санаттарын қамту, балаларды емдеу, дәрі-дәрмекпен қамтамасыз ету төңірегінде бірқатар өзекті сауалдар қойды.

Алмас Өткіров міндетті медициналық сақтандыру жүйесі аясында оңалту көмегінің қолжетімділігі мәселесін көтерді. Сондай-ақ, қала басшылығына мүгедектерге кедергісіз орта құруға қатысты бірқатар сауалдар қойды.

«Министр өтініш берген азаматтың диагнозы негізінде оңалту емінің мүмкіндігін қарастыру жөнінде жедел тапсырма берді. Сонымен қатар, жас жігіттің егжей-тегжейлі сөзін мұқият тыңдаған Ажар Ғиният оны Денсаулық сақтау министрінің мүгедектерге медициналық көмек көрсету жөніндегі штаттан тыс кеңесшісі қызметіне шақырды» деп хабарлады Денсаулық сақтау министрлігі.