Денесі екі күннен соң су бетіне қалқып шықты

Атырау қаласында екі жасөспірім суға батып мерт болды. Екінші баланың денесі 2 күннен кейін табылды.

Бұл туралы Атырау облысы Төтенше жағдайлар департаменті хабарлады.

Қайғылы оқиға 20 шілдеде Атырауда болды. 14 және 13 жастағы екі бала жабдықталмаған жерде суға түсіп, батып кеткен. Құтқарушылар олардың бірінің денесін сол күні кешке тапты.

«2024 жылғы 22 шілдеде Атырау қаласы, сағат 07:50-де Жайық өзенінің су бетінен оқиға орнынан 5-6 шақырым жерде туыстары 2010 жылы туылған баланың мәйітін тапты. Мәйітті Төтенше жағдайлар қызметінің құтқарушылары судан шығарды» деп хабарлады Атырау облысы Төтенше жағдайлар департаменті.

Баланың денесін 15 құтқарушы мен марқұмның туыстары екі күн бойы іздеді.

Төтенше жағдайлар департаменті өңірде орын алған қауіпті су тасқыны жағдайына байланысты Атырау облысында суға түсу маусымы әлі ашылмағанын еске салды.