Delta Bank-тің бұрынғы топ-менеджерлері қамауға алынды

Delta Bank-тің бұрынғы топ-менеджерлері ұсталды. Бұл ақпаратты Қаржылық мониторинг агенттігі растады.

Банк директорлар кеңесінің төрағасы Галина Шалғымбаева, басқарма төрағасы Нұрлан Самзаев мен басқарма мүшесі Кенжегүл Қанатбаева тұтқындалды.

«Аталған азаматтардың ұсталғанын растаймыз. Тергеу ережелеріне сәйкес бұл іске қатысты басқа ешқандай ақпарат жарияланбайды», - деп хабарлады Қаржылық мониторинг агенттігінің баспасөз қызметі.

Естеріңізде болса, бұған дейін Қазақстан депозиттерді кепілдендіру қоры «Delta Bank» АҚ салымшыларына төлем төлеу уақытын 2021 жылдың 23 мамырына дейін созған. «ЦентрКредитБанкі» АҚ тиісті келісімшартқа қол қойды.

Ендігі жерде көрсетілген мерзім ішінде «Delta Bank» АҚ салымшылары агент банк арқылы, кепілдік берілген өтемді өндіру жөніндегі өтінішті тікелей немесе сенім білдірілген тұлға арқылы бере алады.