ДДСҰ сарапшылары Уханьда жұмысын бастады

Қытайға коронавирус пандемиясының себептерін зерттеу үшін қаңтардың басында келген ДДСҰ-ның сарапшылар тобы жұмада екі апталық карантиннен кейін жұмысын бастады. Бұл туралы Twitter-де ДДСҰ хабарлады.

Мамандар карантинді Ухань қонақ үйінде өткізген деп хабарланды.

«Карантинде болған кезде топ күнделікті Қытайдағы қазіргі Covid-19 зерттеулері туралы жаңалықтармен, басқа да ақпараттармен және тәжірибелерімен бөлісетін қытайлық ғалымдармен виртуалды кездесулер өткізді. Сарапшылар ауруханаларға, зертханаларға және базарларға баруды жоспарлап отыр. Далалық сапарларға Ухань институты кіреді», - деді ДДСҰ.

ВВС-дің хабарлауынша, бейсенбіде Қытай билігі ДДСҰ сарапшыларын ашық оймен және саяси араласусыз жұмыс істеуге шақырды. Қытай билігінің пікірінше, бірқатар мемлекеттердің басшылығы сарапшылардың жұмысына саяси астар беруге тырысуда.

Еске салсақ, коронавирустың шығу тегін анықтайтын сарапшылар тобына әлемнің түрлі елдерінен 13 адам кірді.