Дауыстарды санау ұзақ уақыт алады - ОСК

Астана, Алматы және Шымкентте дауыс беру төрт бюллетень бойынша, облыстарда бес бюллетень бойынша өтеді.

Биыл бюллетеньдер көп болғандықтан, дауыстарды санау процедурасы ұзағырақ болады. 20 наурыз күні таңғы сағат 8-де дауыстарды санау аяқталуы тиіс. Бұл туралы Қазақстан Республикасы Орталық сайлау комиссиясы төрағасының орынбасары Константин Петров мәлімдеді.

— Сайлау комиссиялары басқа дауыс беру уақытын белгілемесе, дауыс беру жергілікті уақыт бойынша сағат 7:00-де басталып, сайлау учаскелерінде жергілікті уақыт бойынша 20:00-де аяқталады. Азаматтар таңғы 6-дан бастап дауыс бере алады. Еліміздің барлық дерлік сайлау учаскелерінде дауыс беру жергілікті уақыт бойынша сағат 20:00-де аяқталады, - деді Константин Петров брифингтен кейін.

Оның айтуынша, үш қалада: Астана, Алматы және Шымкент қалаларында дауыс беру төрт бюллетень бойынша өтеді, оның екеуі Парламент Мәжілісінің депутаттарын сайлауға, екеуі мәслихат депутаттары үшін. 17 өңірде бес бюллетень бойынша дауыс беру өтеді: екеуі Мәжіліске, екеуі облыстық мәслихатқа, біреуі аудан немесе қалалық мәслихатқа.

— Дауыс беру сағат 20:00-де аяқталады, содан кейін дауыстарды санау рәсімі басталады. Дауыстарды санау процедурасы бұрынғыдан ұзағырақ болады. Себебі, бюллетеньдер әдеттегіден әлдеқайда көп. Бірақ заң бойынша дауыстарды санау 12 сағаттан аспауы керек, яғни еліміздің барлық сайлау учаскелерінде таңғы сағат 8:00-де дауыстарды санау аяқталуы тиіс. Осыдан кейін сайлау учаскелері өз қорытындылары туралы хаттамаларын тиісті аумақтық округтік комиссияларға жібереді. Біз деректерді 20 наурызда жариялауға тырысамыз, бірақ таңғы сағат 10:00 немесе 11:00 болады деп уәде бермейміз, - деп қосты ол.