Даулы жердің үш түрлі бағасы: шаруа қорытындымен келіспейді

Жамбыл облысы бойынша сот сараптамалары институтының сарапшылары тарапынан олқылықтар шықты. Бір жер учаскесіне екі түрлі баға қойған сарапшылардың әрекетіне шаруа наразылығын білдіруде.

Әкімдікпен соттасып, биліктің әрекетіне наразылығын білдіріп жатқан, жерімен нәпақасын тауып жүрген шаруа Сальвар Таиров Orda.kz тілшісіне келеңсіз жағдай туралы айтып берді.

Не болды?

2007 жылы Жамбыл ауданы әкімдігі шаруа Сальвар Таировқа шаруа қожалығын жүргізуге арналған, жалпы ауданы 0,67 га жер учаскесін берген.

Алайда араға үш жыл салып, артынша 2019 жылы шенділер жер телімін мемлекет мұқтажы үшін мәжбүрлеп алып қою туралы хабарлама жіберген. 2020 жылы жерді сарапшылар 1 124 165 теңгеге бағалаған.

Шаруа 14 жыл бойы осы даулы жер телімін нысаналы мақсаты бойынша пайдаланып, сол арқылы күн көрген.

Ең қызығы тәуелсіз сарапшылар жер телімін мүлде басқаша бағалаған. Таиров мырзаның жері 14 225 330 теңге екені анықталды.

Бір ұйымның екі түрлі қорытындысы

Сарапшылардың қорытындысымен келіспеген шаруа Сальвар сотқа шағым түсірген. Енді Жамбыл облысының мамандандырылған ауданаралық экономикалық сотының анықтамасымен сот құрылыс-тауартану сараптамасы тағайындалған. Оны Жамбыл облысы бойынша сот сараптамалары институты жүргізді.

Сараптама кезінде жердің расымен де 14 305 433 теңге екені расталды. Бірақ араға біраз уақыт салып, даулы жерге қатысы барлар түсініксіз әрекеттерге барған. Осылайша, тәуелсіз сараптама қорытындысына күмән келтірілді. Қайта қараған сот сарапшылары жерді 3 781 618 теңгеге бағаланған. Яғни, үш ай бұрын 14 млн болған жердің бағасы үш есеге арзандап кеткен.

Сот отырысы кезінде мемлекет ұсынған институттың сарапшылары не себепті екі түрлі қорытындыға келгенін түсіндіре алмаған.

Ал Сальвар Таиров «жерді мемлекет меншігіне қайтарудан бас тартпайтынын» алға тартты. Бастысы жердің құнын нарық бағасына сәйкес төлеп берсе болғаны.

Авторы: Исламбек Дастан, Жамбыл облысы