Дәулет Тұрлыхановтың ұлына үкім шықты

Алматы әскери соты Мәжіліс депутаты Дәулет Тұрлыхановтың ұлына үкім шығарды.

Тұрлыхановтың алты баласының ішіндегі төртінші ұлы әрі кенжесі 20 жастағы Нұрасыл Болатқа айыппұл салынды. Оған алматылық заңгер ерлі-зайыптылар Олег Чернов пен Анна Дмитриевичті соққыға жыққаны үшін айып тағылуда.

Істің барлық материалдарын зерделеп, тараптарды тыңдай отырып, сот мынадай қорытындыға келді:

«Нұрасыл Болат Қылмыстық кодекстің 107-бабы 2-бөлігінің 1 және 5-тармақтарында көзделген қылмысты жасағаны үшін кінәлі деп танылып, бір миллион 700 мың теңге көлемінде айыппұл салынсын»,-  деді судья Дихан Әлиасқаров.

Тұрлыхановтың ұлы да екі жәбірленушіге 500 мың теңге, адвокаттардың қызметі үшін 1,6 миллион теңге және мемлекеттік баж ретінде 10 мың теңге төлеуі тиіс. Сондай-ақ сот одан жәбірленушілердің өтемақы қорына 15 АЕК өндірді.

Естеріңізге сала кетейік, оқиға биылғы жылдың 11 ақпанына қараған түні Алматыда болған. Нұрасыл Болат ерлі-зайыпты  адвокаттар  Чернов пен Дмитриевичті қатты соққыға жыққан. Кейінірек Тұрлыхановтың ұлының әскерге шақырылған қатардағы жауынгер екені белгілі болды.

Бұл фактіні қалалық полиция департаменті Қылмыстық кодекстің 293-бабы «Бұзақылық» бойынша тіркеді.

Кейін белгілі болғандай, Нұрасыл Болат адвокат таяқ жеген жерде емес, Отардағы әскери борышын өтеп жатқан жерде болуы керек еді.