Дарын Қонысбаев триатлоннан Азия чемпионы атанды

Қырғызстанның Шолпан-Ата қаласында триатлон спринттен Азия чемпионаты өтті. 60 спортшы қатысқан бәсекеде Қазақстан командасы мықты өнер көрсетті.

Бұл туралы  Orda.kz    Olympic.kz-ке сілтеп хабарлады.

Әйелдер арасынан қазақстандық Екатерина Шабалина күміс жүлдегер атанды. Ол олимиадалық қашықтық бойынша Азия чемпионатындағы үздік алтылық қатарында. Біріншіліктің алтын және қола жүлдесін жапондық Сарика Накаяма мен Чисато Накаджима иеленді.

— Жеңіс тұғырынан көрінгенім үшін қатты қуаныштымын. Бұл менің алғашқы жеңістерімнің бірі. Соңына дейін жұмыс істедім. Маған жол көрсеткен бапкерлеріме рахмет, - дейді Екатерина Шабалина.

Надежда Бекмағанбетова 4-ші, Юлия Озерова 8-ші орын алды. 

Ерлер арасындағы бәсекеде екі қазақстандық спортшы тұғыр биігіне көтерілді. Команда үздігі Дарын Қонысбаев Азия чемпионы атанып, Аян Бейсенбаев қола жүлжеге ие болды.

Жапон Киотаро Йошикава күміс жүлдегер қатарында.

— Бұл менің Азия чемпионатындағы алғашқы жеңісім. Жарыс жоспар бойынша өтті. Жүзуден нәтижем жақсы болған жоқ. Дегенмен, веложарыс кезінде қарсыластарымды қуып жеттім. Ал жүгіру басталғанда өзімнің үздік үштікке енетінімді сездім. Шыны керек, басқа қарсыластарыма қарағанда маған жарыстың жеңіл өтіп жатқанын байқадым. Жеңісім үшін қуаныштымын, - дейді Дарын Қонысбаев. 

Мейірлан Ысқақов 7, Темірлан Теміров 8-сатыда. 15 жасқа дейінгі спортшылар арасында қазақстандық  Никита Дубинский алтын, Станислав Глок күміс, Тимур Бәкіров қола жүлде жеңіп алды. 

Қыздар арасындағы сында қазақстандық Диана Ержанова топ жарып,  Ангелина Редченко үздік үштікті түйіндеді.