Дәрігерлер уланғандарды құтқарамыз деп жол апатына ұшырады

Павлодар облысында кәріз құдығында төрт адам уланып, оларға шақырылған жедел жәрдем көлігі жол апатына ұшырады, деп хабарлады Orda.kz.

«5 қыркүйекте сағат 17.48-де Шарбақты ауылынан кәріз құдығындағы техникалық жұмыс кезінде газбен улану жайлы қоңырау түсті. Орталық Шарбақты аудандық ауруханасына 1956, 1975, 1982 және 1992 жылы туған төрт ер адам жеткізілді»,  деп хабарлады жұма күні Павлодар облыстық жедел медициналық жәрдем станциясы.

Жағдайы ауыр екі ер адам жерүсті санитарлық авиациясымен Павлодарға жеткізіліп, Павлодар қалалық №3 ауруханасының токсикология бөліміне жатқызылды.

Жедел жәрдем станциясы құрамына кіретін және Шарбақты ауылынан келген шақыртуға барған медициналық авиация бригадасы Павлодардағы Толстой мен Астана көшелері қиылысында апатқа ұшырағаны белгілі. Ол Volkswagen Passat көлігімен соқтығысып, оның екі жолаушысы ауруханаға жеткізілді. Оқиғадан дәрігерлер зардап шеккен жоқ.