Дариға Назарбаева жарты миллион табуды ұсынады - видео желілерде тарап жатыр

Ғаламторда Дариға Назарбаева қазақстандықтарға екі сағатта 500 мың теңге табуға мүмкіндік беретін жоба туралы айтып жатқан видео пайда болды.

Белгілі болғандай, бұл фейк, деп хабарлайды Stopfake.kz.

Негізі бұл видеоның түпнұсқасы осыдан үш жылдан астам уақыт бұрын ҚР Сенатының жалпы отырысында түсірілген.

«Бұл кездесу туралы сюжет «Хабар» телеарнасында 2019 жылдың 20 желтоқсанында жарияланған және әлі күнге дейін YouTube желісінде бар. Түпнұсқа видеода сол кездегі Сенат спикері қызметін атқарған Дариға Назарбаева мемлекет туралы, елдегі теміржол саласы жайында әңгімелейді.  Ешқандай тез ақша табуға уәде беретін жаңа жоба туралы емес» делінген хабарламада.

Бейнебаян авторы оны жалған дауыспен, бастапқыда болған жазбаны алмастыру үшін кадрларды кесіп, өңдеген.

Пайда болған жарнамалық бейнеде жылдам ақша табу туралы ақпаратқа сенудің қажеті жоқ. Әдетте, алаяқтар оңай ақша табудың осындай түрлерін тықпалайды.