Дариға Назарбаева Дикий Арманды түрмеден құтқарып қалды

Қазақстанның бұрынғы президенті Нұрсұлтан Назарбаевтың қызы Дариға Назарбаева «Дикий Арманды» түрмеден арашалап алды, деп хабарлайды Orda.kz порталы.

Шымкенттің экс-әкімі Амалбек Тшанның сөзіне сүйенсек, Дикий Арман оның жиенін соққыға жыққан.

«Дикий Арман асып бара жатқан ешкім емес. Қасына он-он бес адам жинап алып жүрген адам өзінше батыр болады ғой. 2005-жылдары депутат болып жүрген кезде Дикий Арманның іс-әрекетіне куә болғанмын. Жиенім, туған қарындасымның баласының автобазары болатын. Соны басқаратын. Сол жерге Арман көлігін сатайын деп барған. Жиенім дәу жігіт болатын. Соны бұлар 4-5 адам жабылып, әбден ұрып, өлердей сабап тастаған. Ол кезде депутатпын. Прокуратураға беріп, сол кезде қаматқанбыз», - деді ол сұхбатында.

Бұрынғы әкімнің сөзінше сол жайтқа Дариға Назарбаева араласып, Дикий Арманды түрмеден аман алып қалған дейді.

«Артынша Дикий Арманды Дариға Назарбаеваның тікелей араласуымен шығарып алды. Парламентте де бұл мәселені көтергенмін. Парламентте Дикий Арман билікпен сыбайлас болып, осындай тірліктер істеп жатқанының бәрін айттым. Артынша оны босатты. Оның хаты бар. Менде хатының көшірмесі әлі күнге дейін бар.
...Бәрі болған оқиға. Сол кездегі биліктің көзін әбден  шел басып кеткен. 2005-2006 жылдары басталған, одан бері қанша заман өтті?!», - деді мемлекет қайраткері.

Ол парламент жиналысында  «Дикий Арманға» және оның билікпен байланысына қатысты мәселе көтергенін атап өтті.

«Егер «Дикий Арман» сияқты қарақшылар билікпен байланысты болса, біз қандай халықпыз? Билік мұндай қарақшыларды жақтаса, ақыры біз қайда барамыз?», – деді мемлекет қайраткері.

Еске сала кетейік, Арман Жұмагелдиевке қаңтар оқиғасындағы Алматыдағы тәртіпсіздіктер кезінде  24 адамды ұрлады деген айып тағылды. 2022 жылдың 2 қыркүйегінде Астанада Ұлттық қауіпсіздік комитетінің бесінші департаментінің бұрынғы басшысы Руслан Ысқақов ұсталды. Хабарланғандай, Арманның ұйымдасқан қылмыстық тобын ҰҚК қызметкерлері қадағалаған - бұл ақпарат 2023 жылдың 5 қаңтарында ресми түрде расталған.

2024 жылдың 8 ақпанында Ішкі істер министрлігі қаңтар оқиғасына қатысты «Дикий Арман» ұйымдасқан қылмыстық тобының күдікті мүшелері ұсталғанын хабарлады.