Дариға Назарбаева КТК телеарнасын сатпақшы

«Дариға Назарбаева КТК телеарнасын сатып жатыр» деген қауесет негізсіз емес, шындыққа айнала бастағанға ұқсайды.

Бұл туралы «БЕСсимптомно» Telegram-арнасы хабарлайды.

Ақпанның 28-і күні Алматыда «Коммерциялық телеарна» АҚ акционерлерінің кезектен тыс жалпы жиналысы өтеді.

Күн тәртібі:

• «КТК» АҚ жарияланған акцияларының санын ұлғайту.
• «КТК» АҚ жарияланған акцияларын шығару ісіне өзгерістер енгізу және өзгерістерді уәкілетті органда тіркеу.

Бірінші кездесу өтпесе, екіншісін 1 наурыз күніне белгілеу.

«КТК» АҚ жәй акцияларының санын көбейтіп, сол арқылы негізгі акционерлердің бірінің үлесін сейілтуі ықтимал. Яғни, осылайша КТК телеарнасының меншік иесінің ауысуы әбден мүмкін» делінген хабарламада.

«КТК» АҚ-ның негізгі акционері – 91,35% акциясы бар Дариға Назарбаева басқаратын «Нұрсұлтан Назарбаев» жеке қоры.

Бұған дейін хабарлағандай, Дариға Назарбаеваның 18 ақпанда Алматыдағы КТК телеарнасына барғаны туралы ақпарат болған, бірақ арнаның өзі бұл ақпаратты жоққа шығарды. Одан кейін, Сергей Киселев «Еуразия» арнасынан кетіп, «Хабар» мен КТК иелері де ауысады деген ақпарат шықты.