Дархан Сатыбалды бұрын қарамағында істеген Марат Пәшімовті қызметке алды

2020 жыл мен 2023 жылдың аралығында Түркістан облысының денсаулық сақтау басқармасын басқарған Марат Пәшімов енді дәл осы салада Алматыда жұмыс істейтін болады, деп хабарлайды Orda.kz.

Ол бұл қызметте 2024 жылдың қарашасынан бері қалалық денсаулық сақтау басқармасын басқарған Әсия Ақанованың орнына келді.

Ресми өмірбаянына қарасақ, Пәшімовтің кәсіби жолының басым бөлігі Түркістан (бұрынғы Оңтүстік Қазақстан) облысы мен Шымкент қаласында өткен. 2020 жылдың сәуірінен 2023 жылдың наурызына дейін ол Түркістан облысының денсаулық сақтау басқармасын басқарды.

Осы кезеңде Марат Пәшімов 7 ай бойы Дархан Сатыбалдының қарамағында жұмыс істеді. Сатыбалды 2022 жылдың тамызынан 2025 жылдың қаңтарына дейін өңір әкімі болған.

Алматыға тағайындалмастан бұрын Пәшімов Кардиология және ішкі аурулар ғылыми-зерттеу институтында істеді. Онда ол басқарма төрағасы қызметін атқарды.