Дәретханадан мүрдесі табылған 3 жасар қыздың қасақана өлтірілгені анықталды

Абайсызда болған жағдай сияқты көрінген дәретханаға түсіп, қайтыс болған 3 жасар баланың өлімі қасақана қылмыс екені анықталды.

Бұл туралы Otyrar хабарлады.

Түркістан облысы Сарыағаш ауданында дәретханаға түсіп қайтыс болған 3 жасар қыздың денесінде сызаттар мен көгерген жерлер бар екенін сараптама көрсетіп берді. Осылай сараптама нәтижесі бойынша бұл жай ғана абайсызда болған жағдай емес, әдейі жасалған қылмыс екені анықталды.

Қайғылы жағдайдан бір ай өткен соң, тағы бір қыз дәл сол дәретханаға түсіп кете жаздаған. Сол кезде ол 16 жастағы көршісін көрсеткен. Полиция тергеу жүргізіп, үш жасар Асылымның өлімі қасақана жасалған қылмыс екенін анықтады. Жасөспірім өзінің іс-әрекетін мойындады. Оның шизофрениямен ауыратындығы белгілі болды.

«Анықталған жағдайларды ескеріп, күдіктінің психологиялық жағдайын назарға алып, оны арнайы медициналық мекемеге орналастырдық. Қазіргі уақытта істің барлық мән-жайын толық және жан-жақты анықтау мақсатында сотқа дейінгі тергеу жүріп жатыр. Полиция шындықты анықтау және әділ шешім қабылдау үшін бар күш-жігерін салады»,  деді ҚР ІІМ мәлімдемесінде.

Еске сала кетсек, қайғылы оқиға мамыр айының ортасында болған еді. Сол кезде көрші қызбен аулада ойнап жүрген үш жасар Асылым кенеттен жоғалып кеткен болатын. Үш күн бойы ата-анасы, туыстары мен ауыл тұрғындары баланы таба алмай, тек үшінші күні оның денесін қарама-қарсы үйдегі дәретханадан тапты.