Данияр Ақышев жаңа лауазымға тағайындалды – дереккөз

Ұлттық банктің бұрынғы төрағасы, Нұрсұлтан Назарбаевтың экс-көмекшісі Данияр Ақышев Азия-Тынық мұхиты банкі директорлар кеңесінің төрағасы болып тағайындалды.

Бұл туралы Dalaincide telegram-арнасы хабарлайды.

«Алексей Коровин Азия-Тынық мұхиты банкінің (АТБ) директорлар кеңесінен кетті. Кеткен Коровин ескі команданың адамы еді. Қазір оның орнына Қазақстанда бас банкир болған, яғни 2015-2019 жылдары Ұлттық Банкке төрағалық еткен Данияр Ақышев бар билікті қолына шоғырландырды. АТБ Банктің уақытша басқарма бастығы болып Қайрат Алтынбеков тағайындалды» делінген хабарламада.

Арнаның хабарлауынша, «Ескі Қазақстанның» бизнесі түгел Ресейге көше бастауы мүмкін.

«Назарбаев үздік қаржыгерлерін Ресейге жіберіп отыр. Бұл оның банк фокусын Қазақстаннан Ресейге аударғанын аңғартады. Қазақ жерінде қалған «Jusan bank» акционерлеріне енді аса қызық емес сияқты. Себебі, заңға енгізілген өзгертулер бойынша, «Jusan bank» мемлекеттік көмекті қайтармайынша, қожайындарына дивиденд төлей алмайды. Жусан 1,5 триллион теңгені мемлекетке қайтарамын дегенше қай заман. Сондықтан акцент Ресейге ауып отыр.

АТБ-ны қазақстандық инвестициялық компания – «Pioneer Capital Invest» ЖШС-і Ресейдің Орталық банкінен аукционда 193 миллион долларға сатып алған болатын. Артынан олар өзі сатып алған Ресей банкін «Назарбаев фонд» дербес қорына аударып берді. Ол қорды – зейнеткер Нұрсұлтан Назарбаев басқарады.

Инсайдерлердің айтуынша АТБ биыл мол табыс тапты. Бірақ бізге есептің шыққанын күту керек. АТБ кейсі оңды болатын болса, «Ескі Қазақстанның» біздегі бизнесі түгел Ресейге көше бастауы мүмкін» делінген хабарламада.

Еске салсақ, Назарбаев қоры Азия-Тынық мұхиты банкі сатып алған болатын.