Дания премьер-министрі Копенгаген көшесінде соққыға жығылды

Осыдан сәл бұрын Метте Фредериксен сайлауалды науқан бағдарламасы бойынша баяндама жасаған болатын, деп хабарлайды Orda.kz.

Дания премьер-министрі Метте Фредериксенді Копенгаген көшесінде ер адам ұрып-соққан. Шабуыл жасаған адам ұсталды.

Шабуыл Культорвет алаңында болды. Премьер-министр болған жағдайға таң қалған, кеңсе бұл жайында түсініктеме беруден бас тартты.

«Бүгін Копенгагендегі Культорвет алаңында Дания премьер-министрі Метте Фредериксенге ер адам шабуыл жасап, оны ұрып-соқты. Метте шабуылдан кәдімгідей  есеңгіреп қалды. Бұл оқиға оны ғана емсе,  оған жақын адамдардың барлығын есеңгіретіп тастағанын айтуым керек» деп жазды қоршаған ортаны қорғау министрі Магнус Хейнике Х әлеуметтік желісінде. 

Бұған дейін премьер-министрдің  Еуропарламент депутаттығына кандидат Кристел Чальдемозбен бірге сайлауалды науқан бағдарламасы бойынша баяндама жасағаны белгілі. 

Фредериксен алғаш рет 2019 жылы парламенттік сайлаудан кейін үкіметті басқарды. Ол Дания тарихындағы ең жас премьер-министр болды. Ол кезде ол 41 жаста еді. 2022 жылғы кезектен тыс сайлаудың қорытындысы бойынша ол қайтадан премьер-министр болып сайланды.