«Дабыл қағуға мәжбүрмін»: заңгер Ербаянның ісінде шикілік барын мәлімдеді

29 қараша 2024 17:20 Альфия Адамбек

Фото: Инстаграм/ inga_imanbay

Құқық қорғаушы Инга Иманбай Ербаянның ісі бойынша сараптаманың дайын болғанын мәлімдеді, деп хабарлайды Orda.kz.

Заңгердің айтуынша, сараптама дайын болғанымен сараптамамен әлі күнге дейін таныспаған. Тергеушінің сылтауы көбейіп, қашқақтап жүрген көрінеді.

«Ербаянның ісі бойынша сараптама дайын. Бірнеше күннен бері Сіздерге айтар жаңалығым бар деп жүргенім осы еді. Негізі сараптама әлдеқашан дайын болған. Бірақ, тергеуші оны екі күн бұрын ғана маған айтты, кеше сараптамамен танысуым керек еді. Мен тергеушімен келіскен уақытта күттім, ол қоңырауға жауап берген жоқ. Кеш болып кеткесін ватсапқа хабарлама жаздым. Жауабы маған сылтау, уақыт созу сияқты көрінді. Тергеуге қатысты күмәнім күшейді. Әйтпесе дайын тұрған сараптамамен таныстырудың несі қиын?», - деді заңгер.

Инга Иманбайдың Ербаянды осы күйге жеткізгендер жазасыз қала ма деген күдігі күшейген. Сондықтан заңгер жағдайды әлеуметтік желіге ашық жазып, тергеуден, құзырлы органдардан жауапты ашық талап етіп отыр екен.

Еске салайық, былтырғы жылдың желтоқсан айында Алматы қаласындағы 5571 әскери бөлімінде Ұлттық ұлан сарбазы Ербаян Мұхтар бас сүйек-ми жарақатын алып, комаға түскен еді. Әскерилер оның дәретханада құлап, басын плиткаға соғып алғанын хабарлады. Туыстары оған келіспеді. Олардың айтуынша, Ербаян түнгі екіде жарақат алған. Ал оның жанында сол уақытта кем дегенде 7 адам болған.

Жаңалықтар

барлық жаңалықтар