Даңқ мемориалын қорлағандар іздестірілуде

Алматы полициясы Даңқ мемориалын қорлағандарды іздестіріп жатыр, деп хабарлайды Алматы қаласының ПД баспасөзі.

«Бұл дерек Қазақстан Республикасы Қылмыстық кодексінің 188-бабы (ұрлық) бойынша сотқа дейінгі тергеп-тексерудің бірыңғай тізіліміне тіркеліп, Медеу аудандық полиция бөліміне тексеру жүргізілуде»  деп хабарлайды Алматы полициясының баспасөз қызметі.

Атап өткендей, тергеу-жедел тобы құрылды.

«Жедел шаралар кешенін жүргізу барысында қылмыстың мән-жайы мен кінәлілер анықталып, олар кейін жауапкершілікке тартылады. Тергеу барысы Алматы қалалық полиция департаменті басшылығының бақылауында»  деп қосты полицейлер.

Бұған дейін Алматыдағы 28 гвардияшы-панфиловшылар атындағы саябақта белгісіз біреулер Даңқ мемориалының шойын табақтары мен хаттарын жұлып алғаны белгілі болған.