Мемлекет мүлкін ұрлаған шенеунік 7 жылға сотталды

Алматы қаласы Қоғамдық денсаулық сақтау басқармасы басшысының бұрынғы орынбасары Әсел Бисенбаева 7 жылға сотталды. Ол дәрігерлерге маска сатып алу кезінде мемлекет мүлкін ұрлаған.

Бұл туралы Orda.kz КТК телеарнасына сілтеме жасап хабарлады.

Іс сәуірде басталып, 4 айға созылған. Іске соңғы нүктені Бостандық аудандық соты қойды.

Экс-шенеунік мемлекеттік сатып алу кезінде 4 млн дана масканы 230 млн теңгеге заңбұзушылық жолмен алған. Іске Әсел Бейсенбаевадан басқа 5 адам қатысты болған. Сот шешімімен барлығы 7-7,5 жылға сотталды.

Сотталушы өз кінәсін мойындамады. Айтуынша, оның электронды цифрлық қолтаңбасын басқалар пайдаланған. Ол қол қою кезінде әкімдікте жиналыста болған. Бірақ сот оны ескермеген.

- Надыров өзінің электрондық қолтаңбасын мемлекеттік сатып алу порталында қол қоюға бермей қойған. Ал, маған шұғыл жұмысты бітіру керек деп келген әріптесім бәрі заң жүзінде, кепіл боламын деген соң сендім. Ол кезде медицина қызметкерлерін ас-сумен қамту керек болатын. Кейін прокуратура алған бетперделердің талапқа сай келмейтінін анықтады. Мені заңсыз соттады. Ел президентінен құқығымды қорғауын сұраймын! Қалалық сотқа апелляциялық шағым түсіреміз! - деді Әсел Бейсенбаева.