Дәрігер көгершіннің етін жеу неліктен қауіпті екенін айтты

Алматы қалалық санитарлық-эпидемиологиялық бақылау департаменті басшысының орынбасары Сәдуақас Байғабылов көгершін етін неліктен жеуге болмайтынын түсіндірді.

Көгершіндердің бойында көптеген вирустық, бактериялық аурулар болады. Осыған байланысты етін жеу арқылы адам вирус жұқтыруы мүмкін. Қалалық көгершіндердің етінен гистоплазмоз, энцефалит, пситтакоз, қызылша, сальмонеллез, аскаридоз, туберкулез және басқа да қауіпті аурулар жұғуы мүмкін, - деді Байғабылов.

Бұған дейін желіде видео пайда болып, жұртшылыққа тарап кеткен еді. Онда Алматы тұрғыны самса сататын қалалық дүңгіршектердің бірі көгершін етін пайдаланады деп күдіктенген.

– Қалдаяқов көшесімен Жібек жолы көшесінің қиылысындағы аялдаманың артында самса сататын дүкен бар. Дүкеннің артында жүк апаратын есік бар. Мен жігітті көрдім, ол сыртқа шығып, көгершіндерді үгінділермен тамақтандырды. Ол еңкейіп, бір көгершінді ұстап алды да самса сататын дүкенге кіріп кетті. Көгершін етінен самса жасайды деген ойдан шошып кеттім. Бір-екі сағаттан кейін ол тағы да көгершіндерді тамақтандыруға шықты, тағы біреуін ұстап алып, самса сататын дүкенге әкетті. Бұл сәт видеоға түсірілген. Біз олардың бұл жерде не істеп жатқанын көрдік. Көгершіндермен халықты тамақтандырып жатыр деп ойлаудың өзі қорқынышты, - делінген хабарламада.

Байғабыловтың айтуынша, қазіргі таңда шағын бизнесті тексеруге мораторий жарияланғандықтан санитарлық дәрігерлердің самса мен донер сататын дүңгіршектерді тексеруге құқығы жоқ.