Covid-19 жұқтырған келіншектің нәрестесі көз жұмды

Қазақстанда дәрігерлер жаңа туған нәрестені құтқара алмады. Анасы жүктіліктің 39-аптасында инфекцияға шалдыққан.

Бұл туралы Orda.kz хабарлады.

Нұр-Сұлтан педиатрлар ассоциациясының жетекшісі Сағира Әбдірахманова бұрын туылған нәрестелер вирустың жеңіл түрін жұқтырғанын, қазір ауыр жағдайлардың бар екенін айтты.

- Бүгін бізде қорқынышты жағдайлар бар. Біз 11 күндік нәрестеден айрылдық, себебі анасы жүктіліктің 39-шы аптасында вирус жұқтырып алған. Туылғаннан кейінгі бесінші күні баланың жағдайы ауырлап, оның миы зақымданды, яғни, нәрестеде инсульт болады, - деді Әбдірахманова.

Содан кейін дәрігерлер баланың жүрегінде, тамырларында және қолқасында қан ұйығанын анықтады. Жаңа туған нәрестені құтқару мүмкін болмады.

Қазір дәрігерлер ұқсас клиникалық көрінісі бар тағы бір нәрестенің өмірі үшін күресуде. Нәрестенің өмірге келгеніне небәрі 20 күн болған.

Педиатр тыныс жолдары, өкпесі зақымданған, тыныс жетіспеушілік белгілері бар балалардың саны артқанын атап өтті. Өткен жылы мұндай жағдайлар болмаған.