Covid-19 вирусына қарсы ресейлік үшінші вакцина «КовиВак» тіркелді

Covid-19 коронавирусына қарсы ресейлік үшінші вакцина тіркелді. «КовиВак» деген атау берілген  вакцинаны Чумаков атындағы ғылым орталығы жасады.

Бұл препарат «өлі» вирустар негізінде жасалған, оның коронавирусқа қарсы тиімділігі жайлы әзірге ақпарат жоқ. Ресейліктер сынақтың үшінші кезеңімен қатар жаппай егу басталады деп жоспарлап отыр. «КовиВак» адам ағзасына коронавирустың жаңа түрінің «өлі» қалдығын енгізіп, иммундық реакция туғызады. Бұл вакцина жұмысындағы классикалық схема болып саналады. Бүгінде мұндай препараттарды Қытай мен Үндістан да өздерінде жасап, қолданып отыр.

Жаңа вакцинаны әзірлеушілер оның коронавирусқа қарсы тиімділігі туралы есеп бермеді. Оны өндіру үшін биологиялық қорғаныш деңгейі жоғары зертхана қажет.

РҒА қарасты М. П.Чумаков атындағы иммунобиологиялық препараттарды зерттеу және дамыту жөніндегі Федералды ғылыми орталығы наурыздың ортасына қарай осы препараттың аптасына 400 мың дозасын шығаруды жоспарлап отыр.

Ресей премьер-министрінің орынбасары Татьяна Голикова бұған дейін «КовиВак» вакцинасын егу наурыздың соңында басталады деп хабарлаған болатын. Наурыз айында вакцина сынағының үшінші кезеңі басталады. Екпе әзірлеушілер сынақ қорытындысын жыл соңына дейін беруі керек.

«КовиВак» вакцинасына дейін Н.Ф. Гамалей атындағы Ұлттық эпидемиология және микробиология ғылыми орталығы шығарған «Спутник V» және «Вектор» мемлекеттік вирусология және биотехнология ғылыми орталығы жасаған «ЭпиВакКорона» вакциналары тіркелген.

Бүгінде «Спутник V» вакцинасы жаппай өндіріске жіберілген. Оны шығарғандар коронавирусқа қарсы тиімділігін 91,6 пайыз деп бағалады.