COVID-19 қарсы екпеден антиденелер бір жылға дейін сақталады

ҚазҰМУ жұқпалы және тропикалық аурулар кафедрасының профессоры Равили Егембердиеваның айтуынша, Sputnik V вакцинасы жоғары иммуногендік потенциалға ие. Ол коронавирусқа қарсы антиденелер өндірісін тудырады, деп хабарлады Orda.kz.

— Коронавирустық инфекциядан кейін иммунитет қалыптасады, бірақ ол ұзаққа созылмайды. Екінші коронавирустық инфекция диагнозы бірінші инфекциядан үш ай өткен соң қойылады, бізде үш айдан кейін ауырып қалатын жағдайлар тіркелген. Сондықтан инфекциядан кейінгі ұзаққа созылатын иммунитет күшті болады деп айта алмаймын, - деді ол брифингте.

Сарапшы Sputnik V вакцинасы ағзаны бір жылға дейін иммунитетпен қамтамасыз ететіндігін атап өтті.

— Қазір Ресейде жасалған басқа вакциналар белгілі және ғалымдардың пікірінше, олар үш жылға дейін иммунитетпен қамтамасыз етеді.

Еске салсақ, қазір Алматы эпидемиологиялық ахуал бойынша «қызыл» аймақта. Соңғы тәулікте қалада коронавируc жұқтырудың 342 жаңа жағдайы тіркелді.