Цирктің бұрынғы директоры Алматыдағы опера және балет театрын басқарады

Алматыдағы Абай атындағы Қазақ мемлекеттік академиялық опера және балет театрына жаңа директоры тағайындалды.

Бұл қызметке цирктің бұрынғы басшысы  Нұрбақыт Бөкебаев келетін болды. Бұл туралы өзінің Facebook парақшасында ҚР Мәдениет және спорт министрі Дәурен Абаев хабарлады.

Басқарма басшысы жазылушыларына өнер ордасын аралап, жұмыс барысымен танысқанын айтып, театрдың бұрынғы басшысы Тайыр Қаратаевқа атқарылған жұмыстар үшін алғысын білдірді. Бұл қызметте ол бір жылға жуық еңбек етті.

Оның бұрынғы басшысы Ая Қалиева 18 ақпанда қызметінен босатылған. Жоғары жақтың бұл шешімі театр ұжымының ашу-ызасын тудырды. Өнер адамдары президентке  хат жолдады. Тағы бір наразылық акциясы өтіп, 2021 жылдың 19 ақпанында театр ұжымы спектакльден кейін сахнаға экс-директорды қолдаған плакаттар  алып шықты.

Бұдан кейін Мәдениет министрлігі Қалиеваның келісім-шарт мерзімінің аяқталуына байланысты жұмыстан шығарылғанын  түсіндірді.

Театрдың жаңа директоры 58 жаста. Ол Алматы облысының тумасы. Елебеков атындағы Республикалық эстрада-цирк техникумын, Жүргенов атындағы Қазақ ұлттық өнер академиясын (театр және кино актері), Қонаев университетінің заң факультетін бітірген. Мәдениеттану ғылымдарының кандидаты.

Бөкебаев осы жылдар ішінде Қазақстан Республикасы Мәдениет министрлігінің бас маманы, Елебеков колледжі мен Жүргенов атындағы театр және кино институтында оқытушы, сол университеттің проректоры болды.

2000-2004 жылдары Алматы қаласы Бостандық аудандық ішкі саясат бөлімінің меңгерушісі, одан кейін Қазақстан халқы Кіші ассамблеясы хатшылығының меңгерушісі, ішкі саясат бөлімінің меңгерушісі қызметтерін атқарды.

Мүсірепов атындағы Қазақ мемлекеттік академиялық балалар мен жасөспірімдер театры директорының орынбасары, Абай атындағы Қазақ мемлекеттік академиялық опера және балет театры директорының бірінші орынбасары қызметтерін де атқарған.

2016 жылдан бері Қазақ мемлекеттік циркі директоры қызметін атқарды.