Цифрлық майнинг: 2 млрд теңгенің заңсыз криптовалюта операциясы немен аяқталды?

Қостанай облысының тұрғыны криптовалютаға қатысты заңсыз операция жасағаны үшін сотталып, 1,9 млрд теңге мемлекет кірісіне өндірілді, деп хабарлайды Orda.kz өңір прокуратурасына сілтеп.

Ведомствоның ресми сайтында жарияланған мәліметке сәйкес, 2026 жылғы 14 шілдеде Қостанай облысының 28 жастағы тұрғынына қатысты сот үкімі заңды күшіне енді. Ол цифрлық активтердің заңсыз айналымы және қылмыстық жолмен алынған қаражатты заңдастыру (жылыстату) бойынша кінәлі деп танылған.

Сот оған 2 жыл бас бостандығынан айыру жазасын тағайындап, мүлкін тәркіледі. Сондай-ақ 7 жыл мерзімге цифрлық активтерді шығару, айналымға енгізу және цифрлық майнингпен айналысу құқығынан айырды.

Тергеу және сот барысында анықталғандай, 2020–2024 жылдар аралығында сотталған азамат тиісті рұқсатсыз Binance платформасында қамтамасыз етілмеген цифрлық активтерді P2P форматында сатып алу-сату бойынша заңсыз қызмет ұйымдастырған.

Қаржылық операцияларды жүргізу үшін ол өз атына, сондай-ақ туыстары мен басқа да тұлғалардың атына рәсімделген банк шоттарын пайдаланған.

Заңсыз әрекет нәтижесінде ол 1,9 млрд теңгеден астам табыс тапқан. Бұл қаражаттың қылмыстық жолмен алынғанын жасыру мақсатында екінші деңгейлі банктердегі депозиттерге орналастырған.

Қостанай облысы прокуратурасының талап-арызы негізінде сот шешімімен сотталған азаматтан мемлекет кірісіне 1,9 млрд теңгеден астам қаражат өндірілді.

Сонымен қатар сот шешімімен мемлекет кірісіне 13,4 млн теңге, 2 жеңіл автокөлік және 7,9 мың АҚШ доллары көлеміндегі цифрлық активтер тәркіленді.

Оқи отырыңыз:

• Қазақстан Ұлттық банкі жанынан криптоактивтердің мемлекеттік резерві құрылады
• Биткоин рекорд жаңартып, бір монетасының бағасы 125 мың доллар болды