Цифрлық даму министрлігі қазақстандықтардың жеке деректерінің таралуынан «Тайвань ізін» тапты

Қазақстанның цифрлық даму министрлігі қазақстандықтардың жеке деректерінің жаппай таралуына Тайвань хакерлерінің қатысы барын хабарлады.

Бұл туралы ҚазАқпарат хабарлайды.

«16 ақпанда GitHub ресурсында белгісіз біреулер қытайлық компанияның деректерінің тарап кетуін жариялады, онда қазақстандықтардың жеке деректері де бар. Тайваньдық хакерлер Қытай хакерлері деректерін бұзып, қытайлық хакерлер сақтаған материалдарды жариялады» делінген хабарламада.

Министрлік хакерлер қазақстандықтардың жеке деректерін жинау үшін бағдарламалық жасақтаманың осалдығын пайдаланды деп есептейді. Цифрлық даму министрлігі Қытайда шығарылған байланыс құралдары арқылы деректердің тарап кету нұсқасын жоққа шығарды.

Ақпан айында желіде Қытай  хакерлерінің қатысы бар деген Қазақстан азаматтарының деректерінің көп мөлшерде  тарап кетуі туралы ақпарат пайда болды.

Цифрлық даму министрлігі хакерлер қазақстандықтардың барлық деректеріне қол жеткізе алмағанын - оларды белгілі бір адамдар тобы қызықтырғанын мәлімдеді. Ведомство бұл шабуылға шет елдердің барлау қызметтерінің қатысы болуы мүмкін деген болжам жасады.

Өткен аптада Ұлттық қауіпсіздік комитеті Қазақстан азаматтарының жеке деректерін жариялауға шетелдік арнайы қызметтердің қатысы анықталмағанын мәлімдеді.