«Челси» үсіп қалмай ма?: Матч жайлы жиі қойылатын сұрақтарға Orda.kz жауап берді

12 желтоқсанда сағат 20:30-да Алматының Орталық стадионында соңғы екі жарым жылда алғаш рет еурокубок матчы өтеді. Кубок аясында «Астана» Лондонның «Челси» командасын қабылдайды. Футболға аса қызығушылық танытпайтындар үшін: неге «Астана» Алматыда ойнайды? Ойын аязда қалай өтпек? Билеттерді әлі сатып алуға бола ма? деген сұрақтар туындауы мүмкін. Осы және басқа да сұрақтарға Orda.kz жауап береді.

Ойын неге Алматыда өтеді?

Алматының Орталық стадионы соңғы рет еурокубок матчын 2022 жылғы 21 шілдеде қабылдады. Ол кезде «Қайрат» Венгрияның «Кишварда» командасымен Конференция лигасының іріктеу кезеңінде ойнаған еді. Алматы командасы сол ойында 0:1 есебімен жеңілді. Ал келесі екі еуромусымда  «Қайрат» КПЛ-дағы төменгі орындарынан тұрып, жарысқа қатыса алмады.

Ал «Астана» Алматы стадионына Астана қаласындағы «Астана Арена» стадионының қайта жөнделуіне байланысты келіп отыр. Осы себептен Қазақстан ұлттық құрамасы да Алматыда матчтар өткізген еді. Ал ішкі чемпионаттағы ойындарын «Астана» футбол клубы «Хан-Тәңірі» стадионында өткізеді. Бірақ «Челси» командасымен болатын матч маңыздырақ болғандықтан, ол Орталық стадионда өтеді.

«Челси» қайдан шықты? 

2023/2024 жылғы Ағылшын Премьер-Лигасының маусымында «Челси» алтыншы орынға ие болды. Бұл командаға Конференция лигасының плей-офф кезеңіне тікелей қатысуға мүмкіндік берді. Ал «Астана» бұл турнирге іріктеу кезеңі арқылы өтті. Қазіргі еурокубоктардың форматы осындай «Челси» сияқты ірі клубтардың «Астана» сияқты кішігірім командалармен кездесіп, бір алаңда ойнауына мүмкіндік береді.

«Қайрат» тек бір рет, Қазақстанның УЕФА-да 22 жылдық қатысу тарихында, Еуропаның үздік 5 лигасындағы клубтармен ойнаған. Ол матч 2015 жылдың 27 тамызында француздың «Бордо» командасына қарсы өткен еді. Айтпақшы, сол кезде алматылықтар жеңіске жеткен болатын.

Ауа-райы қандай болмақ? 

«Челси» мен «Астана» арасындағы деңгей айырмашылығына қарамастан, Алматыда қазақстандық клубқа екі табиғи фактор көмекке келуі мүмкін. Біріншісі — теңіз деңгейінен биіктік. Лондон мен Алматы арасындағы биіктік айырмасы шамамен 30 есе! Лондон теңіз деңгейінен 25 метр биіктікте орналасса, Алматы таулы аймаққа жақын болып, орташа есеппен 800 метр биіктікте орналасқан. Сондықтан «Челси» ойыншыларына таулы климатқа бейімделу қажет болады.

Екінші фактор — аяз. Британдық метеорологиялық қызметтің деректеріне сәйкес, Лондонда қазір бұлтты ауа райы және температура +5+8 градус аралығында. Ал «Қазгидромет» мәліметтері бойынша, Алматыда 12 желтоқсанда күндіз температура −5 градусқа дейін, ал түнде −15 градусқа дейін төмендейді. 

«Астана» футболшылары үшін −15 градус та, әрине, қолайлы емес. Дегенмен, жерлестеріміз лондондықтарға қарағанда аязға жақсырақ шыныққан деген үміттеміз.

Айтпақшы, егер матч Астанада өтсе, онда температура шамамен −8 градус болар еді. Бірақ бұл да Лондонның +8 емес.

Сонымен қатар, минус температурада ойнауға болады, егер негізгі төреші матчты ауа райы жағдайларына байланысты тоқтатуға немесе кейінге қалдыруға шешім қабылдамаса. 

Жанкүйерлерге жағдай жасалды ма?  

−15 градус температура тек футболшыларға ғана емес, жанкүйерлерге де қолайсыз. Бірақ стадионға кіру ережелеріне сәйкес, термоспен ыстық шайды аренаға алып кіруге болмайды. Ыстық сусындар мен жеңіл тағамдарды стадионда сатып алуға болады.

Дегенмен, бұл Алматының Орталық стадионында жанкүйерлерді күтіп тұрған жалғыз қиындық емес. Аренада, мысалы, әжетханалармен проблемалар бар. Иә, стадионның жанында қоғамдық әжетхана бар. Өте үлкен! Мүмкін, Қазақстандағы ең үлкені. Бірақ, батыс трибунасынан оған жету үшін стадионның дәл жартысын айналып өту керек. Алматы қаласы әкімдігінің мәліметі бойынша, бұл мәселе биотуалеттерді орнату арқылы шешіледі.

«Стадион маңында 60 биотуалет орнатылады, оның ішінде мүгедектерге арналған биотуалеттер де болады»,  деп хабарлады қала әкімдігі.

Ал жалған билеттермен стадионға кіру мүмкін емес. Билеттер тек «Астана» мен «Челси» арасындағы матчқа арналып, атаулы болады және оларды тек Zakazbiletov.kz сайтынан сатып алуға болады. Orda.kz тексеріп көрді, билеттер әлі де сатылымда бар. Олар сатып алушының электрондық поштасына тек матч күні жіберіледі.

Стадион кассаларында билеттер жоқ. Егер біреу стадион маңында билеттерді сатуға тырысса, оларға сенбеңіз — олар алаяқтар.

Стадионға дейін қалай жетуге болады?

12 желтоқсанда сағат 18:30-дан түн ортасына дейін стадионға іргелес екі көше жабылады: 

Абай даңғылы-Байтұрсынов көшесінен Мұқанов көшесіне дейін;
Сәтбаев көшесі-Байтұрсынов көшесінен Байзақов көшесіне дейін.

Бірақ әкімдік стадионға дейін сегіз тегін маршрут ұйымдастырады, әрқайсысында 10 автобус бар:

• Қалқаман шағын ауданы (№7 қалалық аурухана аялдамасы) – Орталық стадион. 
• Орбита шағын ауданы (Мұстафин-Торайғыров көшелерінің қиылысы) – Орталық стадион.
• Айнабұлақ шағын ауданы (Мақатаев-Павлодар көшелерінің қиылысы) – Орталық стадион. 
• «Халық Арена» аялдамасы (солтүстік бағыт) – Орталық стадион. 
• Алматы-1 теміржол вокзалы аялдамасы – Орталық стадион. 
• «Райымбек батыр» метрополитен бекеті – Орталық стадион. 
• Наурызбай ауданының ХҚКО аялдамасы – Орталық стадион. 
•  Момышұлы-Мөңке би көшелерінің қиылысы аялдамасы – Орталық стадион.

Автобустар сағат 16:00-ден бастап жүре бастайды.