Челси Астанаға қарсы жас ойыншыларды ойнатады

Челси футбол клубының бапкері Энцо Мареска Астанаға қарсы матчта жастарды ойнататынын мәлімдеді, деп хабарлайды Orda.kz.

Мареска негізігі құрамды елде қалдырып, жаттығуды жалғастыратынын айтты.

«Жағдайды бақылауда ұстауға тырысамыз. Жастарымыз жеткілікті. Екінші команданың ойыншыларын алып барамыз. Қалғандары елде жаттығуды жалғастырады», – деді бапкер. 

Бас бапкер өздері үшін басты мәселе ауа райы болатынын да жасырмады.

«Жаттығудан кейін сегіз сағаттық жолға шығамыз. Жеткен соң кешкі асымызды ішіп, бірден ұйықтаймыз. Басты қиындық алыс жол мен ауа райы болып тұр. Ал жұма күні таңғы алты шамасында Лондонға жетеміз», – деді «Челси» бас бапкері. 

Айта кетейік, 12 желтоқсан күні Астана – Челси матчы болады. Астана аренада құрылыс жұмыстары жүргізіліп жатқандықтан, матч Алматы қаласындағы орталық стадионда болады.