Чехиядан аса ірі алаяқтық жасады деген күдікті экстрадицияланды

Бүгін бас прокуратура мен ішкі істер министрлігінің қызметкерлері сыртқы істер министрлігінің көмегімен аса ірі көлемде алаяқтық жасағаны үшін ұсталған күдіктіні Чехиядан экстрадициялады. 

Ол 2021 жылғы көктемде жәбірленушіге халық тұтынатын тауарларды Қазақстаннан Ресейге тасымалдау қызметін ұсынып, одан кейін алдау арқылы жәбірленушінің 19 миллион теңгеге жуық тауарын иемденген. Кейін оны басқа тұлғаларға сатып, ақшасын жымқырған деген күдікке ілінді. 

Қылмыс жасағаннан кейін күдіктінің жасырынуына байланысты оған халықаралық іздеу жарияланды.

Осы жылғы қаңтарда ол Чехияда ұсталды. Қазіргі уақытта күдікті уақытша ұстау изоляторына қамалды.

Оған осы қылмысты жасағаны үшін мүлкі тәркіленіп, 5 жылдан 10 жылға дейінгі мерзімге бас бостандығынан айыру түріндегі жаза қарастырылған.