Чехия Ресейдің 18 дипломатын еліне қайтарады

2014 жылы Чехия әскери қару-жарақ қоймасында болған  жарылысқа Ресей барлау қызметінің қатысы болуы мүмкін. Осындай желеумен  Ресей елшілігінің 18 қызметкерін еліне қайтару туралы шешім қабылданды. Бұл туралы 17 сәуірде Чехия үкіметінің басшысы Анджей Бабиш пен сыртқы істер министрі Ян Гамачек мәлімдеді.

Бабиштің айтуынша, Чехияның құқық қорғау органдары Врбетиц ауылындағы ауқымды жарылысқа Ресей әскерилерінің қатысы барын дәлелдеген.

— Чехия Республикасы – егемен мемлекет және ол мұндай деректер әшкере болғанда жауап беруі тиіс, -  деді елдің премьер-министрі.

Бұған дейіни  Ян Гамачектің Мәскеу сапарынан бас тартқаны белгілі. Сапар барысында  ол «Спутник V» вакцинасын сатып алу жөнінде келіссөз жүргізуді жоспарлаған. Сол үшін оны  өз коалициясындағы әріптестері де, оппозиция да сынаған болатын.

— Чехияның сыртқы және ішкі істер министрі қызметін қатар атқарып отырған Ян Гамачек Ресей елшілігінде істейтін 18 дипломаттың шын мәнінде Ресей бас барлау басқармасы (ГРУ) мен сыртқы барлау қызметінің адамдары екенін дәлелдейтін айғақтың барын айтты. Дипломаттарға елден кетуге 48 сағат беріліп отыр, деп хабарлады «Неміс толқыны» радиосы. 

Ресей мемлекеттік думасы халықаралық істер жөніндегі комитетінің төрағасы Леонид Слуцкий  18 дипломаттың қайтарылуы Чехия мен  Ресей арасындағы  қарым-қатынасқа нұқсан келтіретіндігін, Ресейдің бұл шешімге қарымта қайтаратынын мәлімдеді.