Чехия аспанында ақша жауды: тікұшақ миллион долларды шашып өтті

Чехияның астанасы Прага маңында бір долларлық купюрадан жаңбыр жауды. Оны жергілікті Kazma атты блогер  ұйымдастырып,  арнайы тікұшақ жалдаған.

Басында Kazma өзінің түпнұсқа фильміндегі кодты шеше алатын кез келген адамға миллион доллар беруге уәде етті. Дегенмен, бұл жұмбақтың мәнін  шешкен адам болған жоқ.

Содан кейін блогер уәде етілген ақшаны өзінде қалдырмауға уәде беріп, жаңа байқау жариялады. Жексенбі күні таңертең Kazma өзінің веб-сайтында тіркелген жазылушыларға шифрланған орынды электрондық пошта арқылы жіберді. Ол Прагадан 30 шақырым жердегі егістік алқап болып шықты.

Белгіленген сағатта егістіктің үстінде аспанда  контейнері бар тікұшақ пайда болды, одан миллион долларлық купюралар жауды. Бұл кезде жер бетінде бірнеше мың адам «көктен жауатын табыстарын» күтіп тұрған болатын. Еуропалық ақпарат құралдарының хабарлауынша, келгендердің сөмкелеріне банкноттарды жинап салуға бір сағаттай уақыты кеткен.