«Cалық саясатын қатаңдатпаймыз»: Тоқаев салық реформасы туралы пікірін айтты

Мемлекет басшысы Қасым-Жомарт Кемелұлы Тоқаев салық жүктемесі әділетсіз бөлінетін жағдайға әкелгенін мәлімдеді, деп хабарлайды Orda.kz.

«Шын мәнінде, біз салық саясатын қатаңдатпаймыз, керісінше ретке келтіреміз. Қазіргі кодекс көп өзгеріске ұшыраған. Заңға тәуелді актілерге және жекелеген жағдайларда басқаша ереже қолданатын ерекшеліктері көп. Кодекс оқып, түсінуге қиын құжатқа айналған. Соның салдарынан кәсіпкерлер мен мемлекеттік қызметкерлер оны әрқалай қабылдап, өз уәждерін алға тартады. Қаптаған жеңілдіктер мен салық режимдері кәсіпкерлердің бір бөлігіне артықшылық берсе, тағы бірі оған наразы. Ол да негізсіз емес», – деп мәлімдеді Тоқаев.

Сондай-ақ, бастапқыда салық жеңілдігі экономиканың белгілі бір салалары мен бизнестің нақты санаттарын қолдау мақсатында енгізілгенін айтты. Ал кәсіпкерлер жеңілдікті бас пайдасына жаратып, салықтан жалтарып, бизнестерін бөлшектей бастағанын және Қазақстан жаппай офшор аймағына айналып кетпеуі керектігін жеткізді.

«Мұның бәрі салықты басқару жүйесін күрделендіріп, салық жүктемесі әділетсіз бөлінетін жағдайға әкеп соқты. Қазір Парламентте мүлде жаңа Салық кодексі қаралып жатыр. Аталған құжат бизнестің де, мемлекеттің де мүддесін ескеріп, кәсіпкерлерді салықты дұрыс төлеуге ынталандыруы тиіс. Қосымша салық түсімдері даму бюджетін ұлғайтып, жаңа мектептер, ауруханалар және басқа да әлеуметтік нысандар салуға мүмкіндік береді. Ашық және тұрақты салық жүйесі еліміздің инвестициялық әлеуетін күшейтеді», – деді президент.

Айта кетейік, президент Шымкент қаласына барғанда қаланың әлеуметтік-экономикалық даму барысын біліп қайту үшін сапарға шыққан болатын.

Еске сала кетейік, қазақстандық есепшілер салық реформасына қарсы Тоқаевқа үндеу жолдады.