Бүлікшілер экс-президенттің әкесінің қабірін өртеп жіберді

Сирияда бүлікшілер бұрынғы президент Башар Асадтың әкесінің кесенесін бүлдіріп, қабірін өртеп жіберді, деп хабарлайды Orda.kz DW басылымына сілтеме жасап. 

Мәліметтерге сүйенсек, қарулы бүлікшілер алдын ала дайындық жасап, өздерінің туын тастан қаланған үлкен кесенеге алып келген. Олар ғимараттағы әйнектерді сындырып, Башар Асадтың әкесі Хафез Асад моласына от қойды. Ішінде тұрған табытты далаға алып шығып, оны да өртеп жіберді. Бұл ақпаратты Сирия адам құқықтары жөніндегі обсерваториясы растады. 

Башар Асадтың әкесі Хафез Асад 1930 жылы Жерорта теңізі жағалауындағы Латакия қаласы маңындағы Кардаха ауылында туған. Ол билікке 1970 жылы төңкеріс нәтижесінде келген. Хафез Асад елді отыз жыл бойы әскер күшімен ұстаған. 2000 жылға дейін ел басқарған. Хафез Асад билігі кезінде саяси бақталастарын қудалаған. 2000 жылы Хафез Асадты арнайы кесенеге жерлеген.