Бұзылған бөгеттерді салған компанияларға қатысты тергеу басталды

Қаржы мониторингі 3 облыста бөгеттерді салған компанияларға қатысты тергеуін бастады, деп хабарлайды Orda.kz порталы.

Алматыда ТЖМ «Қазселденқорғау» ММ-мен келісімшартқа отырған мердігер ұйымның директоры бюджет қаражатын жымқырды деген күдікке ілінді.

«ЖШС» Ақсай өзенінің бассейнінде селді ұстайтын бөгет салу» жобасын жүзеге асырған. ЖШС-ның жауапты тұлғалары алдын ала сөз байласу арқылы аса ірі көлемде бюджет қаражатын жымқырды деген күдікке ілінді. Залал сомасы алдын ала есеп бойынша 775 млн теңгеден асады», - деді ҚР Қаржылық мониторинг агенттігінің ресми өкілі Әлібек Әбділов ОКҚ алаңында өткен брифингте.

Ал Ақтөбеде «Магаджан» бөгетін сенімгерлік басқаруға алған ЖШС басшысына қатысты сотқа дейінгі тергеу басталды.

«Анықталғандай, 2014 жылы бұл бөгет балық шаруашылығын жүргізу мақсатында жеке компанияға сенімгерлік басқаруға берілген. Алайда ЖШС бөгетті күтіп ұстау және қызмет көрсету бойынша өз міндеттерін орындамаған», - деді спикер. 

Сондай-ақ Ұлытау облысында да ЖШС лауазымды тұлғаларына сотқа дейінгі тергеу басталды. ЖШС көктемгі су тасқыны кезінде жақын маңдағы аумақтарды шайылып кетуден қорғау үшін Жезді өзеніне санация жүргізу үшін  ұзындығы 2 шақырым, жалпы сомасы 485,5 млн теңгеге мемлекеттік мекемемен шарт жасасқан. Алайда ЖШС 282,5 млн теңгеге жоба бойынша құрылыс-монтаждау жұмыстарын нақты орындамаған. Салдарынан 26 үй су астында қалып, 174 адам эвакуацияланды.