БҰҰ Қауіпсіздік кеңесі Ресейдің Украина биологиялық зертханаларына қатысты қарарын қабылдамады

Ресей мен Қытай қарарды қолдап дауыс берсе, АҚШ, Ұлыбритания және Франция қарсы дауыс берді.

Біріккен Ұлттар Ұйымының Қауіпсіздік Кеңесі Украинадағы әскери биологиялық әрекеттерді тексеру жөніндегі комиссия құру туралы Ресей қарары жобасын қабылдаған жоқ, деп хабарлайды РИА Новости.

Ресей бастамашы болған құжат 15 дауыстың тоғызын ала алмады. Ресей мен Қытай қарар үшін дауыс берсе, АҚШ, Ұлыбритания және Франция қарсы дауыс берді. Қалған елдер қалыс қалды.

Қауіпсіздік кеңесі отырысында Ресейдің БҰҰ жанындағы тұрақты өкілінің орынбасары Дмитрий Полянский Батыстың қарар бойынша келіссөздерді үзгенін айтты.

— Біз батыстық әріптестеріміздің қарар жобасы бойынша келіссөздер процесіне шын мәнінде көңіл бөлмегеніне өкінеміз. Бактериологиялық (биологиялық) заттарды әзірлеуге, өндіруге және жинақтауға тыйым салу туралы конвенцияда көзделгендей, Батыс елдері Ресей ұсынған тиісті материалдарды қарайтын және олар бойынша тексеру жүргізетін комиссия құрудан қорқатыны белгілі болды, - деді Дмитрий Полянский.

Дауыс беруден кейін Полянский БҰҰ Қауіпсіздік Кеңесінің шешіміне қатты көңілі қалғанын айтып, Ресейдің Украина аумағындағы биологиялық зертханалардың қызметін тексеруді жалғастыратынын атап өтті.
Қарар жобасында Қауіпсіздік Кеңесі (егер қабылданса) «Ресей Федерациясының АҚШ пен Украинаға қарсы шағымында айтылған талаптарды орындауға қатысты  тексеру үшін Қауіпсіздік Кеңесінің барлық мүшелерінен тұратын комиссия құру туралы шешім» мен «Украина аумағындағы биологиялық зертханалардың қызметі тұрғысынан Конвенция бойынша міндеттемелер» қабылданады деп болжанды.   

Жоба сондай-ақ 2022 жылдың 30 қарашасына дейін БҰҰ Қауіпсіздік Кеңесіне ұсыныстары бар баяндаманы ұсынуды, сондай-ақ BTWC мүше-мемлекеттерін Женевада 28 қараша мен 16 желтоқсанда өтетін шолу конференциясында хабардар етуді талап етеді.

Бұған дейін Ресей Қарулы Күштері Радиациялық-химиялық және биологиялық қорғаныс әскерлері (РХБҚ) басшысы генерал-лейтенант Игорь Кириллов Украина аумағында 30-дан астам биологиялық зертханалар желісі құрылғанын, олар Пентагон  мүддесі үшін жұмыс істейтінін айтқан болатын.