Бұрынғы вице-министрлер БНБ бас директорынан пара алып жатқанда ұсталды

Бұрынғы вице-министрлер БНБ бас директорынан пара алып жатқан жерінен ұсталды. Қаржылық мониторинг агенттігі ақша беріп жатқан мезетті көрсетті, деп хабарлайды Orda.kz.

Иә, Бірінші несие бюросының басшылығы Еңбек ресурстарын дамыту орталығының басшылығына үнемі пара беріп келгенін, олардың беті бүлк етпестен пара алып отырғанын естіген жұрттың таң қалғаны анық.

Бүгін мемлекеттік қызметкерлерден тек Ақмәди Сарбасов қана емес, тағы екі вице-министр ұсталғаны белгілі болды. Еске салсақ, Сарбасов еңбек және халықты әлеуметтік қорғау вице-министрі қызметін бес жыл атқарған.

Іске қазіргі БНБ бас директоры Руслан Омаров пен тағы бір бұрынғы вице-министр Дәулет Арғындықовтың (бұрын ҚР Денсаулық сақтау және әлеуметтік даму вице-министрі болған) қатысы бар екені белгілі болды. 

Алматы қаласы бойынша Қаржылық мониторинг агенттігінің департаменті «Еңбек ресурстарын дамыту орталығы» АҚ мен «Бірінші несие бюросы» ЖШС басшылығына қатысты сотқа дейінгі тергеуді бастады.

«БНБ басшылығы қаржы ұйымдарының сұраныстарын алу үшін қажетті ақпараттық қызмет көрсету кезінде өз мүдделерін көздеп «Еңбек ресурстарын дамыту орталығы» АҚ басшылығына жүйелі түрде заңсыз сыйақы беріп отырғаны анықталды»,  деп хабарлады Қаржылық мониторинг агенттігінің баспасөз қызметі.

Күш құрылымдары өкілдерінің айтуынша, үш тұлға да 28 маусымда кезекті пара беріп жатқан кезде ұсталды. Олар шамамен 75 мың АҚШ доллары (шамамен 39 миллион теңге) пара алып жатқан еді.

Тергеу жүргізіліп жатыр.