Бұрынғы тергеуші Алматыда есірткімен ұсталды

Алматыда есірткі қылмысына қарсы күрес басқармасының қызметкерлері екі әйелді гашиш пен мефедронмен ұстады. Олардың бірі жуырда ғана ішкі істер органдарында жұмыс істеген, деп хабарлайды Orda.kz.

Orda.kz дереккөзінің мәліметінше, күштік құрылымдардың тінтуі кезінде олардан 3,5 келіге жуық есірткі табылды. Сонымен қатар, ұсталғандардың бірінен қызметтік куәлік табылған.

«Жалдамалы пәтерге тінту жүргізіліп, есірткі заттары тәркіленді. Олардың нақты шығу тегі мен кімге тиесілі екенін сот-химиялық сараптама анықтайды. Күдіктілер уақытша ұстау изоляторына қамалды. Өзге мән-жайлар анықталуда»,  деп мәлімдеді Алматы полиция департаменті.

Бізге тінту сәтінен түсірілген кадрлар да түсті. Фототағы қызметтік куәлікке қарағанда, ұсталғандардың бірі Қарағанды полициясында тергеуші болып жұмыс істеген. Алайда, Қарағанды облысының полиция департаменті «ұсталған В.Елена 2024 жылдың 29 тамызында өз еркімен жұмыстан шыққанын» мәлімдеді.  

Бұл – полицейлердің есірткі саудасымен айналысқаны туралы алғашқы оқиға емес. 2022 жылдың мамыр айының соңында Ақтөбеде қалалық полиция бөлімінің қызметкері ұсталған болатын. Погондағы дилер қылмыстық істер бойынша айғақ ретінде алынған есірткі заттарын ұрлап, сатумен айналысқан. Ол бірден екі бап бойынша сотталды, есірткі сату және қызметтік жалғандық жасау.