Бұрынғы спорт министрінің ағасы жұдырық ала жүгірді

Атырауда бұрынғы мәдениет және спорт министрі Ермек Маржықпаевтың ағасы Ерік Маржықпаев  жасөспірімдер арасында бокстан Қазақстан чемпионатында жанжал шығарды, деп хабарлайды Orda.kz. 

Оқиға Ақтауда өткен жастар арасындағы бокстан Қазақстан чемпионатында болды. Төрешілер шешімімен келіспеген бапкер Ерік Маржықпаев төрешіге бірнеше соққы жасаған.  

Жанжалдың әрі қарай ушығып кетпеуіне екі мәрте Олимпиада ойындарының күміс жүлдегері Әділбек Ниязымбетов кедергі жасапты.  

Қызығы сол, осыдан 7 жыл бұрын да Ерік Маржықпаев басқа турнирде де төрешіні ұрып, шеттетілген еді. Ол кезде бапкер өз ұлының жекпе-жегінде әділетсіз шешім қабылданды деп есептеген.  

Оқиға болғаннан кейін Маржықпаев сабасына түсіп, төрешілерден кешірім сұраған. Қазақстан бокс федерациясы оқиғаға байланысты атқару комитеті отырысын өткізіп, Ерік Маржықпаевты 2 жылдық мерзімге жарыстарға қатысудан шектеген.  

«Жиын қорытындысы бойынша Ерік Маржықпаев бапкерлерге, төрешілерге және турнир ұйымдастырушыларына құрметсіздік танытып, Қазақстан Республикасының спорттағы этикасын бұзғаны үшін 2 жыл мерзімге жергілікті, республикалық және халықаралық бокстан жарыстарға қатысу құқығынан шеттетілді»,  деп нақтылады ведомство.

Айта кетейік, Ерік Маржықпаевтың інісі, бұрынғы мәдениет және спорт министрі Ермек Маржықпаев биыл тамыз айында қызметінен босатылған. Артынша,Ермек Маржықпаев премьер-министрдің кеңесшісі қызметіне тағайындалды.