Бұрынғы мәдениет вице-министрінің не үшін ұсталғаны белгілі болды

Антикор бұрынғы мәдениет және спорт вице-министрінің неге және қалай ұсталғаны туралы мәліметтерді бөлісті.

Антикордың ресми өкілі Арман Тілеукеновтің айтуынша, бұрынғы вице-министр 1 наурызда жасырын шаралар нәтижесінде ұсталған. Ол аса ауыр сыбайлас жемқорлық қылмысын жасады деген күдікке ілінген. Антикор оны атын атаудан бас тартты. Алайда әңгіме Ерлан Қожағапанов туралы екені белгілі.

"Ол коммерциялық ұйымның мүддесін көздеп, 2018 жылы Петропавлда Қазақстан Республикасы мен Ресей Федерациясының XV өңіраралық ынтымақтастық форумының көрмесін ұйымдастыру туралы келісім жасаған. Бұл форумды өткізуге арналған сметалық баға екі есеге ұлғайып, бюджет қаражатының негізсіз жұмсалуына әкеп соқты",  деді Арман Тілеукенов.

Ресми өкілдің айтуынша, күдікті екі айға қамауға алынды. Оның мүлкі бұғатталды, себебі тергеушілердің айтуынша, бұрынғы вице-министр оны қылмыстық жолмен тапқан ақшаға сатып алған.