Бұрынғы энергетика вице-министрі Kazenergy қауымдастығын басқарады

«Kazenergy» мұнай — газ және энергетика кешені ұйымдары қауымдастығының бас директоры болып энергетика министрінің бұрынғы орынбасары Жандос Нұрмағанбетов тағайындалды. Ол сыртқы істер министрлігіне жұмысқа ауысқан Әлібек Қуантыровтың орнына келді. 

Бұл туралы «Kazenergy» қауымдастығының баспасөз қызметі хабарлады. 

Жандос Нұрмағанбетовтің тағайындалғаны туралы мұнай-газ саласының сарапшысы Нұрлан Жұмағұлов өзінің телеграм арнасында хабарлады. Қауымдастықтың бұрынғы бас директоры Әлібек Қуантыров сәуірден шілде айының соңына дейін сыртқы істер министрлігі басшысының орынбасары болып тағайындалғанға дейін қызмет атқарды.

Нұрмағанбетов Жандос Демесінұлы 1981 жылы Жамбыл облысында дүниеге келген.

• Е. Бөкетов атындағы Қарағанды мемлекеттік университетін, Халықаралық бизнес университетін, Қорқыт ата атындағы Қызылорда мемлекеттік университетін, «КИМЭП Университеті» АҚ бітірген.
• Еңбек жолын 2003 жылы жеке құрылымдарда бастаған.
• 2005-2010 жылдары — «Қызылорда ТЭК» АҚ бас директоры.
• 2011-2013 жылдары – «Қызылорда» ӘКК» ҰК» АҚ басқарма төрағасы.
• 2013 жылдан бастап 2019 жылға дейін жеке компанияда жұмыс істеді.
• 2020 жылдан бастап қазірге дейін «KEGOC» АҚ Стратегия және даму жөніндегі басқарушы директоры қызметін атқарды.
• 2021 жылдың соңында Энергетика вице-министрі болып тағайындалды. 

Мұнай-газ саласында деректерді жинау, талдау, өңдеумен айналысатын маман Олег Червинский атап өткендей, Жандос Нұрмағанбетов 2023 жылдың желтоқсан айында Екібастұз, Риддер, Теміртау және басқа қалалардағы энергетикалық нысандардағы апаттар салдарынан министрдің орынбасары қызметінен кетті. Сол сәттен бастап ол мемлекеттік қызметте қызмет атқарған жоқ.

«Kazenergy» қауымдастығы мұнай-газ, электр энергетикасы және атом өнеркәсібінде жұмыс істейтін компанияларды біріктіреді.