Бұрынғы депутат елордада рұқсатсыз үйлер салып жатыр

Премьер-министр мәслихаттың бұрынғы депутаты Ғабит Сәтмағамбетов басқаратын G-Park құрылыс компаниясының проблемалық нысандарына қатысты сөз қозғады.

Олжас Бектеновтің айтуынша, құжаттама мәселесіне байланысты салынып жатқан көптеген нысандарға қауіп төніп тұр. G-Park да рұқсатсыз үй салатын компаниялардың тізімінде.

«Елордада G-Park компаниясы рұқсатсыз жеті тұрғын үй салуда. Оларға 3,5 мыңға жуық отбасы ақшасын салған. Сонымен қатар, Астанада Араби-2, Гранитный-2 тұрғын үй кешені осыдан 10 жылдан астам уақыт бұрын проблемалы деп танылған. 200-ге жуық отбасы баспана ала алмай жатыр»,- деді Үкімет басшысы.

Жалпы, индустрия министрлігі ел бойынша заңсыз салынған 340-тан астам тұрғын үй кешенін есептеді. Бектенов бұл ең алдымен әкімдіктердің кемшілігі деп атады.

Ұзақ мерзiмдi құрылыс жобалары бойынша шешiлмей отырған мәселенi ескере отырып, премьер-министр индустрия министрлiгi мен әкiмдiктерге маусым айының басына дейiн құрылыс салушыларды құрылыстың заңдылығы мен құжаттамасының бар-жоғын тексерудi тапсырды. Сондай-ақ, барлық үйлердің пайдалануға берілуін қатаң бақылауға алуды тапсырды.