Бұрынғы әйелін жалаңаш видеомен бопсалаған ер адам сотталды

Атырау облысында ер адам бұрынғы әйелін жуынатын бөлменің терезесінен видеоға түсіріп бопсалады.

Бұл туралы Атырау облыстық сотының баспасөз қызметі хабарлады.

Олар бұрын некеде болып, кейін ажырасқан. Араларында кәмелетке толмаған 5 бала бар. Сот шешімі бойынша 5 бала анасының қамқорлығында қалды. 

Ажырасқаннан кейін ер адам бұрынғы әйелінің тұрып жатқан жеріне рұқсатсыз кіріп, жуынатын бөлменің терезесінен видео түсірді.

Келесі күні бұрынғы жұбайын нотариусқа шақырып, осы видеолармен бопсалап, ортақ үйлерінің жарты  құнын беруді талап етті. Бас тартқан жағдайда бейне жазбаны әлеуметтік желілерге таратамын деп қорқытты. Жәбірленушіні қолхат жазуға мәжбүрлеп, озбырлық жасады. 

«Сот отырысында жәбірленуші сотталушының тергеу барысында және сот үкімі шыққаннан кейін құқық қорғау органдарының оған және оның балаларына жақындамау туралы бұйрығына қарамастан, тыныштық бермеді. Оның соңынан еріп, балағат сөздер айтты. Сонымен қатар, қазіргі уақытта ішкі істер органдарымен сотталғанға қатысты өз баласын өз-өзіне қол жұмсауға итермелеу фактісі бойынша қылмыстық іс қозғалып жатқаны анықталды» делінген хабарламада.

Баяндалғандарды ескере отырып, үкім өзгертілді: ҚК-тің 389-бабының 3-бөлігі бойынша сотталған азамат 1,5 жылға нақты бас бостандығынан айырылды. Ол сот залынан дереу қамауға алынды.