Бурабайдағы Ұлттық құрылтай: журналистер 20 шақырым жерден жағдайды бақылайды

Президенттің қатысуымен Бурабайда Ұлттық құрылтайдың IV отырысы басталды, деп хабарлайды Orda.kz. 

Журналистер құрылтай болып жатқан жерден 20 шақырым қашықтықта жағдайды бақылап, ақпарат таратады. Құрылтай Rixos Borovoe-да өтіп жатыр. 

Бүгін Ұлттық құрылтайдың Бурабайда өткізілетін екінші күні. Жиында мемлекет басшысы сөз сөйлеп, Ұлттық құрылтай мүшелері қоғамдағы өзекті мәселелерге қатысты ұсыныстарын ортаға салады. Президент Қасым-Жомарт Тоқаевтың төрағалығымен 2022 жылдың маусымында алғаш рет жиналған құрылтай мүшелері биыл төртінші рет бас қосуда. 

Былтыр Ұлттық құрылтайдың үшінші отырысында көтерілген бастамалар нәтижесінде 10 заң жобасы ұсынылып, 9 заң қабылданды. Ұлттық құрылтайға қатысушылар еліміздің әр өңірінен келді.

Құрылтайдың бұған дейінгі отырыстары Ұлытау, Түркістан, Атырау сияқты тарихи маңызы бар қалаларда өтіп, қоғамдағы өзекті мәселелерді талқылауға және шешімдер қабылдауға мүмкіндік берді.