Бурабайда асық атудан оқу-жаттығу жиыны өтуде

V Дүниежүзілік көшпенділер ойындары қарсаңында Бурабайда асық ату мен бес асықтан Қазақстан құрамасының кезекті оқу-жаттығу жиыны басталды, деп хабарлайды Orda.kz.       

25 шілдеге дейін жалғасатын оқу-жаттығу жиыны Щучинск қаласындағы қысқы спорт түрлері бойынша республикалық олимпиадалық даярлау орталығында өтуде.

«Осындағы оқу-жаттығу жиынына Астана, Шымкент, Ақмола, Ақтөбе, Павлодар, Түркістан облыстарынан келген ұлттық құрама мүшелері жиналды, мұнда спортшыларды V Дүниежүзілік көшпенділер ойындарына дайындалу үшін барлық жағдай жасалған. Бұл жарыста жақсы өнер көрсетіп, жеңіске жету үшін бар күш-жігерімізді саламыз», - дейді  асық атудан Қазақстан құрамасының бас бапкері Жомарт Сабыржанұлы.

Бұл жыл басынан бері Асық атудағы төртінші оқу-жаттығу жиыны. Соңғы оқу-жаттығу жиынын V Дүниежүзілік көшпенділер ойындары алдында Астанада өткізу жоспарлануда.

Республикалық асық ату федерациясы Қазақстан Республикасы Ұлттық спорт түрлері қауымдастығы құрамына кіреді. Сонымен қатар, қауымдастықтың құрамына бәйге, көкпар, аударыспақ, садақ ату, жамбы ату, теңге ілу, құсбегілік, тоғызқұмалақ, JORYQ және т.б. федерациялар кіреді.

Қазақстан Республикасының Ұлттық спорт түрлері қауымдастығына белгілі кәсіпкер, меценат, «Altyn Qyran Foundation» ҚҚ қамқоршылық кеңесінің төрағасы Исламбек Сәлжанов жетекшілік етеді.