Букмекерлік жарнамаларға тыйым салынады

Букмекерлік кеңсе жарнамасына тыйым салу туралы түзетулер қабылданды, деп хабарлайды Orda.kz. 

Мәжілістің жалпы отырысында жұмыс тобы ғимараттар мен құрылыстарда, онлайн-платформалар мен БАҚ-та букмекерлік кеңселер мен тотализаторларды жарнамалауға тыйым салуға қатысты түзетулерді қабылдады.

Алай бұл түзетуге спорттық іс-шаралар өткізу кезінде спорт нысандарының ішінде орналасқан жарнама, букмекерлік кеңселердің интернет-ресурстары мен спорттық бағыттағы БАҚ пен абоненттік мобильді құрылғылардағы жарнама кірмейді. 

Бұл ретте отандық телеарналар халықаралық спорт жарыстарын тікелей трансляциялау кезінде букмекерлік кеңселер мен ұтыс ойынын жарнамалай алады. Сонымен қатар түзетулер ұялы байланыс операторларына электронды казинолар, онлайн-казинолар, сондай-ақ халықтың абоненттік құрылғыларына құмар ойындар мен бәс тігулер туралы жарнаманы қамтитын мәтіндік хабарламаларды жіберуге тыйым салуды көздейді.

Сондай-ақ депутаттар шартты түрде сотталғандарға құмар ойындарға қатысуға тыйым салуды ұсынды.